ШӨКЕР ДИМЕН
Элек әллә-ниләр кирәк иде,
Чама белми иде хыялым.
Хәзер инде артыгы кирәкми,
Хыялның да чиген тыямын.
Булганына шөкер диям хәзер,
Тормыштан артыгын сорамыйм.
Әллә-нигә җитешмәдем диеп,
Хыялымны кабат урамыйм.
Хан сарае миңа кирәк түгел,
Җитә төзеп куйган өем дә.
Якыннарны гына ала күрмә,
Чиргә салыштырма берен дә.
Китап чыгарырга кирәк кебек,
Әмма була яшәп ансыз да.
Туганнарым, иң якын дусларым
Исән булсын, әҗәл, кул сузма.
Ниләрем бар, шуңа мин ризамын,
Булганнары янда калсыннар.
Ходаем сакласын казалардан,
Сөйгәннәрем бергә булсыннар.
Венер ФӘТТАХ 08.10.2024 ел Карламан