Qələmin qırılsın sənin ey fələk,
Bu nə talehdir ki, yazmısan mənə?
Sevincin üstündən bir xətt çəkərək,
Məzarı sağ ikən qazmısan mənə.
Mən qara bəxtimin girovundayam,
Sən dərd qandalını vurdun qoluma.
Mən könül bağında gül bitirərkən,
Tikanlı məftillər çəkdin yoluma.
Ağlaya bilmirəm ürək boşalsın,
Sanki qəsavətli daşdır bu ürək.
Əslində ürək yox, sənsən günahkar,
Ürəyi kəndinə bənzətdin fələk.
Sağ ikən cəhənnəm atəşi gördüm,
Yandırdın sən məni, hərarətim var.
Nə qədər gec deyil göndər əcəli,
Bəxtimdən Allaha şikayətim var.