Къырымтатар аталар сёзлери ве айтымларында къадын ве къадынлыкъ меселеси
Аталар сёзлери ве айтымлар халкъ агъыз яратыджылыгъынынъ энъ къадимий ве яйгъын жанрларыдыр. «Халкънынъ чокъ асырлыкъ ичтимаий-тарихий теджрибесини умумийлештирген ве онынъ лакъырды тилине кирген къыскъа, амма терен маналы метин ибарелер»ге аталар сёзлери дейлер. Айтымлар да оларгъа якъындыр, лякин толу ве кочьме манагъа малик олгъан аталар сёзлерине бакъкъанда олар «битмеген фикирни ифаде этелер» эм де грамматик къурулышы джеєтинден фаркъланалар. Умумен эм аталар сёзлери, эм де айтымлар асырлар девамында агъыздан-агъызгъа, несильден-несильге кечип, халкънынъ къаарь-къасевети, къуванч ве кедерини, арзу-ниетлерини, умют