"Марий Эл" газет - поро йолташет

🧶❄️ Луман, поранан игече "Марий Эл" газетым лудаш, меж шӱртӧ гыч носким пидаш лач келшен толеш. А те, йолташ-влак, мом ыштылыда тыгай игечыште? Комментарийыш возен да фотом колтен кертыда❤️ Алевтина Байкован фотожо

Мо тыгай илыш? Мер тазалык да медицине профилактике рӱдерым вуйлатышын алмаштышыже Наталья БЛОШЕНКО йодышлан тыге вашешта: «Илыш – тиде тарванылмаш». Республикыштына 12-18 январьым Чолга илыш-йӱлам кучаш кумылаҥдыме арня семын увертарыме. Чолга илыш-йӱла – тиде профессионал спорт але тренировко огыл, а тазалыкым арален кодаш да пеҥгыдемдаш полшышо тыглай физзарядке. Тарванылаш сайрак. Диваныште шинчен, кечым телевизорым ончен эртараш – шот огыл. Тыгай айдеме нелын черланен да жап деч ончыч колен кертеш. Айдеме просто йолын коштмыжо але физзарядкым ыштымыж дене инфаркт, инсульт, гипертоний, сакыр диабет, остеопороз дене черланен кертме лӱдыкшым иземда, капкыл нелытым нормышто куча, организмын аралыше куатшым кугемда, виян да лывырге, нӧлтшӧ кумылан, стрессым чытыше лиеш, сайын мала, эркын шоҥгемеш. Таза илыш-йӱлам кучаш йӧршынат неле огыл. Эр еда иктаж 10 минут физзарядкым ышташ, кече мучко йолын кошташ, йоча але уныка дене модын куржталаш гын, тазалыкат, кумылат эре сай лийыт. Марий Эл Тазалык аралтыш министерствын фотожо.

«Россия-1» телеканал дене эртыше «Голубой огонёк» передачыште посна тӱткыш СВО-н участникше-влаклан ойыралте. Нунын коклаште Волжский районысо Памар села гыч Кристина Калягина ыле. У ий телепрограммым сниматлымашке землячкына СВО кумдык гыч миен. Кристина Калягина (Петрусенко) специальный военный операцийым эртарыме кумдыкышто фельдшерлан 2024 ий годсек тырша. Позывнойжо - «Сойка». Россий Федерацийын Обороно министерствыж дене контрактым ыштымыж деч ончыч Волжск оласе рӱдӧ больницын терапевтический отделенийыштыже медсестралан пашам ыштен. Кристина нерген ӱмаште 21 мартыште лекше «Марий Эл» газетыштына возенна. Ты гана землячкына Рӱдӧ телеканалын студийже гыч россиян-влакым У ий дене саламлыш. Памар библиотекын воткыл лаштыкше гыч налме фото.

Шорыкйол пайремыште могай гына калык йӱлам ышт шукто. Тидым фотола гычат ужын кертыда.

💐Таче, 2 январьыште, Марий Элын калык писательже, Марий Эл культурын сулло пашаеҥже, Россий Федерацийын сулло журналистше Ипполит Лобанов 75 ияш лӱмгечыжым палемда. "Марий Эл" газет редакций лӱм дене тудым шокшын саламлена! Кужу ӱмырым, пеҥгыде тазалыкым тыланена! ✅Юбиляр нерген материалым ссылке почеш эртен лудса: газетамарийэл.рф/sylnymut-d... ✍Геннадий Сабанцев. 📸Фотом "Марий Эл" газет редакцийын архивше гыч налме.

🎶«Гармонь сем чонем тарватен» Шернур район Кукнур кундемын тале эргыже Кирилл Новоселовым таче кечын Марий Элыште шукын палат. Тудо Кукнур кыдалаш школышто 9-ше классыште веле тунемеш гынат, гармонист-влакын тӱрлӧ конкурсыштыжо ойыртемалтын шуктен. Мер илышыштат шкенжым чолган ончыкта. Таче Кирилл – мемнан унана. ✍️Лидия Шабдарова 📸Фотом еш альбом гыч налме. ✅Умбакыже ссылке почеш лудса: газетамарийэл.рф/garmon-sem...

Лудаш тунемше ок йом Марий йылме дене печатлалтше изданий-влаклан Россий почтын чыла пӧлкаштыже возалташ лиеш. – Таче кундемыштына «Марий Эл» газетым ныл еш налеш, «Сурт-печым» – 24, «Марий Эл» + «Сурт-пече» комплектым – индеше. Нине изданий-влакым лудшо-шамыч деке ныл почтальон мӧҥгышкыштак намиен пуа. Тылеч посна марий йылме дене печатлалт лекше газет ден журнал-влакым, почто пӧлкаш лӱмынак толын, оксала налше-шамычат шагалын огыл улыт, – палдарыш Волжский районысо Сотнур почто пӧлкан вуйлатышыже Лидия Иванова. – Таче, мутлан, ик еҥ «Сурт-пече» газетлан 2026 ийын икымше пелийжылан возалте. Кӧ изданийым кидыш кучен лудаш тунемын гын, тудо газет да журнал дене кылым огеш йомдаре, шонем. А тыгайже тӱҥ шотышто илалше еҥ-шамыч улыт. Шке жапыштыже Сотнур кундемыште илыше калык печатлалт лекше изданийым моткоч шуко лудын. Тыгеат лиеден, почто яшлыкыш огыт пурат, почтальон газет ден журнал-влакым озаштлан пӧртышкыштак пуртен пуэн. – Тунам селаштат, яллаштат калык шуко илен, кызыт пеш шагал кодын, – ешарыш почто пӧлкам вуйлатыше. Лидия Иванова почто пашаште 38 ий тырша. Тиде жапыште тӱрлыжымат ужын. Мутлан, икана Сотнур почтын зданийышкыже КамАЗ машина керылт пурен, вара тӱҥ леведыш гыч пӧртӧнчыкӧ неле лум волен возын, да пырдыж эшеат шелын каен. Йӧршын шаланымыж деч тудым чарак веле кучен. Таче тыште йоҥгыдо, волгыдо да каньыле – зданийым кок ий ончыч капитально олмыктеныт, да тудо у гай лийын. – Тӱҥжӧ шокшо, вет тымарте зданийым коҥгаш олтен гына ырыктенна, – куанен палемдыш Лидия Ивановна. Сотнур почто пӧлкаште эртыше тылзе мучаште лийынна. Лидия Ивановна дене мутым вашталтымына годым залыште калык ситышынак погыныш, черетат шочо. Иктышт коммунал услуго дене пайдаланымылан тӱлат, весышт газет ден журналым, конверт ден открыткым налыт, нылымшышт посылкым колтат… Икманаш, паша шолеш веле. – Йӧнан верыште шинчена. Калык кевытыш, аптекыш, больницыш мойн толеш да мемнан декат пура. Южо кечын 50 утла еҥымат обслуживатлена, – чеверласыме деч ончыч рашемдыш Лидия Иванова. Маргарита ИВАНОВА. Авторын фотожо.

⚡Владимир Путин: «Томск областьысе Стрежевой олам «Еш ипотеке» программыш пурташ сӧрем. Застройщик-влаклан пӧртым сдатлыме жапым кусарыме мораторийым тений мучашлаш кӱштем. Пачерым налше-шамычлан сравочым кучыктыман. Икманаш, застройщик-влакын обязательствыштым шуктымо системым шотыш кондыман. Пӧртым чоҥен пытарыде, застройщик весым чоҥаш тӱҥалшаш але, чоҥен пытарыде, тудым шуэн кодышаш огыл». ⚡Владимир Путин: «Частный аптекылаштат льготан эмлан ак фиксироватлыме лийшаш. Льготан эмым пуышашлан федеральный средствам тичмашын колтымо. Нелылык верлаште лектеш, логистике дене кылдалтеш. Аптечный системым вияҥдымылан тӱткышым ойырыман. Тыште вер гыч верыш куснылшо аптеке полшен кертеш».

🌲 🚆 Йошкар-Олаште У ий поездым вашлийыныт.

Марий Йӱштӧ Кугызан илемжым «Служение» муниципал премийлан темленыт. Тидын нерген шке ТГ-каналыштыже Шернур район администрацийым вуйлатыше Александр Кугергин увертарен. Резиденций «Кумдыкым вияҥдымаш – калыкын улан илышыже» номинацийыште таҥасаш тӱҥалеш. Йӱштӧ Кугызан илемжым 2012 ийыште пашаш колтеныт. Ий гыч ийыш Кукнур селасе тӱвыра пашаеҥ-влак тудым тӱзатен толыт, экскурсий программым пойдарат. Тений гына тушко 7 тӱжем наре турист толын каен. Премийым ойырымо шотышто эскерыше комиссийын заседанийже иктешлымашым вес ийын апрельыште ыштышаш. Тунамак Москваште сеҥыше-влакым палемдышаш улыт. https://газетамарийэл.рф/kazhne-ijyn-kumdykym-tӱzatat/