КУГАРНЯ газет

Муралта моторын Злата Шернур посёлко гыч Злата Васильева дене ӱмаште «Ший памаш» финн-угор эстраде мурым мурымо регион-влак кокласе йоча фестиваль-конкурсышто палыме лийынна. Тунам ӱдыр «Шочмо мланде» муро дене выступатлен. Сценыште шкем кучен моштымыжо, порын шыргыжмыж дене тудо ончышо-шамычын кумылыштым савырен да шке ийготан-влак коклаште икымше вер дене палемдалтын. Тыршен тунемше, активистке Злата Шернур посёлкысо Н.А.Заболоцкий лӱмеш 2-шо №-ан школышто 9-ше классыште тунемеш. 11-ше классым кӱкшӧ отметке-влак дене пытарен, экзамен-шамычым сайын сдатлен, университетыш Тӱнямбал кыл факультетыш тунемаш пураш шонем, манеш. Ӱдыр тыршен тунемеш, тыгодым школышто эртаралтше ятыр мероприятийыш кумылын ушна, «Движение Первых» толкынын чолга еҥже. Мураш – чон йодмо сомыл – Мо шкем шарнем, эре мураш йӧратенам. Тидыже ачам деч куснен, шонем. Тудо муро тӱня дек лишылжак огыл (производствышто пашам ышта) гынат, йӱкшӧ пеш мотор, чон йодмо почеш мура. Авам – хореограф. Шӱжаремат мураш мастар, тудо мыйын семын сольно огыл, хорыш мураш коштеш, – палдара З.Васильева. «Ший памаш» конкурсыш ушнаш Златам вокал дене туныктышыжо Светлана Николаевна Иванова таратен. Тылеч ончычат ӱдыр ты конкурсышто ик гана участвоватлен ыле. «Шочмо мланде» муро нелыжак огыл, но мотор, садлан конкурслан тиде композицийым ойырен налынна манын палемдыш ӱдыр. Каласыман, Злата утларакшым рушла мутлана, туге гынат марий мурым чылт яндарын, акцент деч посна йоҥгалтарен. – Марла умылем, вет мӧҥгыштына ача-авана шочмо йылме дене мутланат. Но йолташем-влак дене, школыштат рушла кутырем, садлан мурымем годым иктаж шомакым йоҥылыш ойлен колтем гын, авам мыйым тӧрлата. Такшым мураш мыланем – тиде чон йодмо сомыл. Тыге мый шке шижмашем почын пуэм, неле годымат мурем. Иктаж пашам ыштыме годымат шке семынем эре мурем, – манеш ӱдыр. Мунчалтат, канат Яра жапыште Злата тӱрлӧ сийым ямдыла. Тидлан аваж деч эре тунемеш. Ӱдырлан иктаж-могай тамле печеньым кӱкташ поснак келша. Шке ыштыме эн тутло кочкышыжо – чыве шылан фунчоза, ешыште чылан йӧратен кочкыт. Каныш кечылаште Златамыт ешге ковашт дек Аптулят ялыш кудалыт. Тушто пӱртӱс лоҥгаште канат, курык гыч мунчалтат, мончаш пурат. Ончыкылан шонымаш, палемда Злата, тӱня мучко путешествоватлаш. Тидлан ӱдыр кызытак ямдылалтеш – англичан йылмым сайын тунемеш. Адакшым Злата еҥ-влак дене кылым вашке муын моштышо, весела кумылан, садлан тудын шонымашыже шукталтешак! Ирина Александрова

🏚Кумдыкым комплексно вияҥдыме программе дене келшышын, Йошкар-Олаште кандаш аварийный пӧртым кораҥдышаш улыт Йошкар-Олан мэржын вриожо Антон Трудинов «ВКонтакте» соцкылысе лаштыкыштыже увертарен: Свердлов уремысе 38, 38а, 38б, 40, 42, 44, 44а, 44б чот тошто пӧрт-шамычым пужышаш улыт. Ты проектым илышыш шыҥдарымылан кӧра 193 еҥ кызытсе жаплан келшыше тӱзатыме илыме верыш кусна. 🏗🌳 Территорийым эрыктыме деч вара 19,5 тӱжем квадрат метр кумдыкышто у объект-влакым, тидын шотыштак Сергий Радонежский лӱмеш гимназийыш кугурак класс-влаклан пристройым, чоҥаш палемдалтеш. Проект тыгак корным, тротуарым олмыкташ, парковкым ышташ да ужар кушкылым шындаш палемда.

Сеҥымаш дене пӧртылам манметым ом мондо, эргым, нигунам… Ӱмаште майыште Морко район Кораксола ял калык кугу куатан, лӱддымӧ марий патыр Алексей Игнатьевым пытартыш корныш ужатен. Старший сержант Алексей Эдуардович СВО-што 2025 ий апрельыште колен. Лу тылзе мучко аваже Валентина Георгиевнан шинчавӱдшӧ ок кошко, чонжо коржеш. Эргыжын уке лийме дене илышын чеверже, тамже йомыныт. «Кочо пӱрымаш. Идалыкыште кок эн лишыл, эн йӧратыме, эн сай да эн поро еҥнам ужаташ логалын. Майыште эргым тойымо, а октябрьыште СВО-што Курск лишне вуйым пыштыше 19 ияш Егор уныкана дене курымешлан чеверласенна», — шинчавӱд йӧре ойла Валентина Георгиевна. Военныяк лияш шонен А.Игнатьев ачаже Эдуард Изосимович гай кӱкшӧ, лопка туп-вачан, таза марий кушкын, койышыж дене аважым ушештарен: тыгаяк поро да шыма. Элым йӧратымаш, чын верч шогымаш Алексейын вӱрыштыжак лийыныт. Тудын тукымыштыжо шукын сарым эртеныт. Мутлан, ачажын могырым кугезе кочаже Алексей Васильевич Васильев I тӱнямбал сарыште кредалын. «Чочоем Семён Михайлович Будённыйымат ужын. Ончыч имне кавалерий дене сарыште кредалыныт. Ик кредалмаште чочоем тушман шашке дене руалтен. Командирже огыл гын, кола ыле, шке имньышкыже пыштен, сӧй пасу гыч луктын. Но пӱрнен кушмо пале ӱмырешыжлан кодын», – палдарыш Эдуард Изосимович. Э.Игнатьев шкежат чын гражданин. Оршанкысе педколледжым физкультурым туныктышылан тунем пытарен, вара ятыр ий милицийыште пашам ыштен. Ачажымак ончен, очыни, Алексей военный лияш шонен. орешгпар Валентина Георгиевна каласкала: – Алёш эргым Морко районысо Шӱргыял кыдалаш школым тунем пытарен. Йочаж годымак военный пашам йӧратен. Школышто тыршен тунемын, спорт дене кылым кучен. Ленинградысе военный училищыш пурынеже ыле, но конкурс кугулан кӧра кертын огыл. Вара 1996 ийыште Марий радиомеханический техникумын студентше лийын. А 1997 ийыште Россий Армий радамыш каен. Контрактым подписатлымеке, Чечнясе конфликтыште участвоватлен. 2015 ийыште Сирийыште военный операцийыште индеш тылзе патырлыкшым ончыктен. СВО тӱҥалме икымше кечынак тушто лийын. Такшым военный контрактше пытышаш ыле, но тудым умбакыже шуен. Патриот улам манын, оҥжым нигунам кырен коштын огыл, тидым паша дене ончыктен. Угарман кундемысе Мулино посёлкысо военный полигонышто шуко жап лийын. Вара Харьков направленийыш колтеныт. Водитель лийын, снарядым шупшыктен. Изюм олам налмаште кредалын. Но вара мӧҥгеш олам коден каяшышт логалын. Тушман чот лӱйкален. Тунам эргымым Юмо утарен. Алёш аракам йӱын огыл, тамакым шупшын огыл. Но СВО таратен. Отпускыш мӧҥгӧ толмеке, аракам подылмыжым ужынам. «Эргым, тыйже кочывӱдым от йӱыс…» – манынам. А тудо каласен: «Авай, чон коржеш. Тый куржат, а воктене ик йолташ камвоч кодеш, весе, кумшо…Чылам утарыме шуэш, но от керт». Эргым СВО-што шагал огыл йӧсым ужын, кажне салтакын пӱрымашыже тыгай, очыни. Но мылам шукыжым каласкален огыл, лач ачажлан ойлен. Купянск олаште руш войска дене ятыр жап лийын. Ӱмаште 8 Мартлан отпускыш мӧҥгӧ толын. Лейтенант званийым налнеже ыле, эшежым Марий радиомеханический техникумышто газонефтяной специальность-влак отделенийым тунем пытарышаш улмаш. Тудын лач контрактше пытышаш ыле, но Алёш шке салтакше-влакым коден каен огыл. Тудо мотострелковый ротын командирже лийын. Пырля служитлыше кажне салтакым эргыже-влак семынак чаманен да арален. Луганскысе военный полигоныштак тудо идалык наре шуко рвезым военный пашалан туныктен да сай салтакым ямдылен. Кушто войскашт лийын, Алексейын ачаж ден аваже сайын огыт пале, икте раш – Купянск направленийыште. «Луговой» Колымыж кечын марий салтакын чонжо чон олмышто лийын огыл, пуйто ала-мом шижын. Тамара пелашыж денат молгунамсе дене таҥастарымаште шукырак жап мутланен. Ик шагат кечывал гыч кум шагат марте иктым-весым кутыреныт. «Кайык-влак» таче поснак чот ажгыненыт, тидыже чонем чот тургыжландара манын каласен. А йӱдым нине «кайык-влак» ятыр салтакым кошартеныт, нунын коклаште «Луговой» позывноян олыкмарий талешке, йӧратыме эрге, пелаш да ача Алексей Эдуардович Игнатьев лийын. А.Игнатьев Тамара Владимировна пелашыж дене кок эргым шочыктеныт. Кугуракше, Рома, Серпухов олаште ракетный войскасе военный иститутышто кумшо курсышто тунемеш, ачаж семынак военный корным изинек ойырен. Эн ончыч Морко посёлкысо 6-шо номеран школышто кадет классыште тунемын, вара 10-шо да 11-ше класслам – Чебоксарыште ПФО-со Чуваш кадет корпусышто. А Игнат аваж дене Угарман кундемыште улыт. Рвезе 7-ше классыш коштеш. «Чеверын, уныкам…» Валентина Георгиевна ден Эдуард Изосимовичым ӱмаште илыш сайынак почкен. Эн ончыч эргым тойышт, вара – Егор уныкаштым – Наташа ӱдырыштын эргыжым. 18 ияш Егор, 2024 ийыште школым тунем пытарымеке, МарГУ-ш пурен. Но тунемын шуктенжат огыл. Ноябрьыште, иктыланат ойлыде, шке кумылын СВО-ш каен. Курск областьыште лийын. Контрактым подписатлымеке, иканаште передовойыш логалын. Икымше жапыште поснак йӧсӧ дене тӱкненыт, ятыр кече шужашышт логалын. Икана кочкашышт тӱрлым конденыт. Егор чыла кӱсенышкыже пряникым оптен. Тыге тудо «Пряник» позывноян лийын. – Егор армийыштат служитлен огыл, военный пашаштат нимом пален огыл, но чон йодмо почеш элым аралаш шогалын. Йӧратыме ӱдыржӧ лийын. Тудым, СВО гыч пӧртылмеке, марлан налаш шонен. Самырык вийвал рвезылан илаш да илаш ыле…Кызыт аваже, Наташа ӱдырна, ойгырен, чӱчкыдын черлана. Кок колойжо ден пелашыже лыпландарат, но чонышто улшо пусталыкым садыгак темаш ок лий, – манеш Валентина Георгиевна. Аван ойгыжо – почеламут корнылаште Валентина Георгиевна «Авангард» колхозышто шуко ий пашам ыштен. Кадровик, бухгалтер пашам шуктен, вольыкымат пукшен. Кораксоласе «Муро кумыл» ансамбльын участникше лийын. Эргыч – СВО-што, а тый мурен, куштен коштат маншыжат лийыныт. Тунам Валентина Георгиевналан шканже йӧндымын чучын, ала чынжымак тиде сай огыл, шонен. Арын черкын бачышкаже Николай ача дечат тидын шотышто йодын. Николай ача тиде язык огыл, вет те, неле пагытыште порылык, йӧратымаш нерген мурен, калыкын кумылжым нӧлтеда манын каласен. Алёш эргыжат аважлан ойгыраш огыл кӱштен. Илыман, куаныман, манын. Кызыт Валентина Георгиевна сылнымутлан шӱмаҥын. Эргыжлан пӧлеклалтше почеламутым Колумб лудмаште йоҥгалтарен. Мутшым Елена Григорьева возен, а Валентина Георгиевна вара шке семынже келыштарен. Мыняр ешыш ойгым конда пуламыр, мыняр чоным тудо сусырта?! Шуко, моткоч шуко. Лишыл еҥым йомдарымеке, авалан, пелашлан, йочалан илаш вийым садыгак муман. Сӧй пасуэш вуйым пыштыше, шуко вӱрым йомдарыше салтакын илышыже арам лийшаш огыл. Вет тудо, шкенжым чаманыде, пытартыш шӱлыш марте элжын, ешыжын пиалан ончыкылыкышт верч шоген.

Марий Эл Правительстве Председательын алмаштышыже – тӱвыра, печать да калык-влакын пашашт шотышто министр Константин Иванов «Марий Эл» кугыжаныш ансамбльын балет артистше Тимур Щеглов дене вашлийын. Тимур кызыт спецопераций зонышто шочмо элым арала. Тудо изишлан мӧҥгыжӧ отпускыш пӧртылын. Тиде жапыште пӧръеҥ родо-тукымжым да коллегыже-влакым ужын шуктен. Константин Ивановын кумылжо тарванен: тыгай неле жапыштат боец республикыште хореографийын вияҥмыж нерген ок мондо да коллектившын илышыж шотышто тургыжлана. Тудо тыгак «Герои Марий Эл. Талешке-влак» СВО-н участникше-влаклан полышым пуаш ышталтше регионысо программе нерген ушештарен. 📦 Лишыл жапыште боец-влаклан кӱлеш арверым погат. Нуным вара Тимур Щеглов передовойыш наҥгая.

🚧 Марий Элыште Параньга – Уньжинский корнын 14-ше километрыштыже Элнет эҥер гоч кӱварым капитально олмыкташ тӱҥалме. Кызыт тушто жаплан кӱварым шогалтеныт да тошто конструкцийым рончат. 48 метр кужытан кӱварым 2026 ий 9 ноябрь марте ыштен шуктышаш улыт, палемдыме Марийскавтодорышто. 📌Олмыктымо жаплан участкыште 50 км/ч деч кугу огыл писылык дене реверсивный движенийым пуртымо. Палемдыман: паша «Инфраструктура для жизни» нацпроект почеш шукталтеш.

Мураш да куандараш шочын! Светлана Сушкина. Тиде лӱмым колмеке, вигак шинча ончылнем ужар сывынан Светлана Сергеевнам ужам. Очыни, мыйын коштмо эстраде сынан концертлаште сценышке лачак тудым чиен лектеден. Ӱдырамашын ийготшым огыт ойло маныт гынат, ты гана палемдыде огеш лий: Марий Элын калык артисткыжлан 14 январьыште 80 ий теме. Тышеч 50 ий утла жапшым тудо мурылан пӧлеклен. Ава деч посна… Марий Турек район Арбор кундемысе Кукрем ялыште илыше Сушкинмыт ешыште кум акак-шӱжарак да ик эрге кушкыныт. Кызыт кок пачашан пӧртышт олмышто Виче кундемышкыла кугорно шуйналт возын. Икымше пачашым кугу кӱ дене оптымо, а кокымшыжо пу лийын. Йырваш оралте: кок пачашан пӧртӧнчыл, кок пачашан клат, вӱта, леваш, амбар. Тидын нерген Светланан Людмила акаже каласкалыш: – Мый эн кугурак икшыве улам. Почешем Светлана, вара Анфиса да Василий шочыныт. Авана, шольынам ыштымеке, кок арня гыч колен. Сандене тулыкеш кодынна да изава дене кушкынна. Тунам 1-ше классыш каенам ыле. Азам ончаш шукыжо мылам логалын. Ачанам, партийный пашаеҥым, налогым погаш шогалтеныт. Йолташыже-влак тудым «Генсек» маныныт. Ленинградыш тунемаш колтеныт улмаш, но каен огыл. Сандене ачаланна вес верыш председательлан каяш шӱденыт. Тыге ме Сардаялыште илаш тӱҥална. Кум ий утла деч вара мӧҥгеш суртышкына пӧртылынна. Варажым изава поче-поче кок шочшым ыштен, а чылаже кум ӱдырышт да ик эргышт шочын. Светлана ден Анфиса шӱжаремым Параньгасе школ- интернатыш колтеныт. А мыйым, кугурак семын, шочшо аза-влакым ончаш полшаш коденыт. Шӱжарем-влак каникуллан толеденыт, но угыч тушко кайымышт гына шуын, вет извате осал ыле. Интернатым пытарымеке, Светланам Йошкар-Олашке культпросветшколыш, а Анфисам строительный училищыш конденыт. Но Анфисам вигак налын огытыл, сандене тудым олаштак шогалтен коденыт. Директор омса воктене шортын шогышо ӱдырым чаманен да «Тунемше-влак кокла гыч иктажше училищым кудалтен кая, варажым тудын олмеш лият» манын налын. «Ачада тендам, йоча-влакым, чаманен мо?» йодмемлан Людмила Сергеевна тыгерак вашештыш: – Ачамын чаманымыжым омат пале, кырен да вурсен огыл. Мӧҥгыштат тудо пеш шагал шоген. Колхоз, ялсовет председатель лийын, депутатышкат сайленыт – эре калык коклаште коштын. Малаш да кечываллан кочкаш гына толын… Ачашт 1939 ийыште армийыш каен, Прибалтикыш логалын. Варажым Кугу Отечественный сар тӱҥалын. 1943 ийыште сусырген да мӧҥгӧ пӧртылын. «Кидышкыже снаряд осколко пурен, но пӱчкаш пуэн огыл, кидше лӱмжылан веле кечен. Вургемым чияшат тудлан полшена ыле», – шарналта кугурак ӱдыржӧ. Ты ешыште икшыве-шамычлан неле лийын. Людмила Сергеевна йоча жапышт нерген шинчавӱд деч посна каласкаленат ок керт. Утларакшым лач тудлан шуко чыташ логалын. Тачат кугурак семын шольо-шӱжарже-влаклан мутым куча, ӱмыржӧ мучко нунылан полшен шога. Ачажынат шочшыжо-шамычым ятыр ончен, но тачылан кылышт уке. Тыгодымак ешарена: школ-интернат Светланалан музык тӱням почашыже полшен. Тушто марий ӱдыр хорышто да поснат мураш тунемын, ече дене коштын, куржталын да баскетболла модын. Паша корно Кульпросветшколышто ик ийым тунеммеке, Светлана Иваново областьысе Фурманов олаш текстиль фабрикыш пашам ышташ лектын кудалеш. Кум ий тушто тырша. Марий мурым колмеке, шӱм-чонжо Марий кундемыш пӧртылаш кӱшта. Светлана «Электроавтоматике» заводыш пашаш пура. А тусо пашаеҥ-влак, мурымыжым колмеке, «Тыланет мураш кӱлеш» манын, почылтшо музыкально-драматический театрыш каяш темлат. Тыге 1969 ий 10 январьыште ты театрын хорышкыжо ушна. Эше заводышто пашам ыштымыж годымак музучилищын дирижёрско-хоровой отделенийышкыже пура да кас еда мураш тунемаш коштеш. Кум ият пеле деч вара вокал отделенийыш кусаралтеш. Педагогшо Фаина Олейниковам сценыш лукшо кресавалан шотла. А вара 25 ияш ӱдыр Озаҥ консерваторийыш тунемаш кая. Эше дипломым налын шуктыдеак, Дж.Пуччинин «Чио-Чио-сан» оперыштыже Сузунин партийжым мура. Тунам ты партийым ик артистке веле мурен, тудыжат черланен. Тыге, 10 кече репетировалымеке, Светлана сценыш лектын. Усталык кас Шукерте огыл нелын черланыме деч вара С.Сушкина угыч театрыш толын да ынде визымше ий пел ставкыште пашам ышта. Ончычсо семынак мартыште бенефисым эртарыме нерген шонкала. «Молан март, вет январьыште шочында?» йодмылан тудо тыгерак вашештыш: «Мыйже шым тылзаш ош тӱням ужынам, мартыште шочшаш улам улмаш, очыни, сандене тиде тылзе эреак лишыл». С.Сушкина сопрано йӱкан опер мурызо, Марий Элын сулло артисткыже Ева Коваленко дене ик жапыштак театрыш толыныт. Ева Петровналан 3 мартыште 75 ий темеш. Сандене тений нуно усталык касымат пырля эртараш палемденыт. А пӱртӱс Светлана Сушкиналан йымыжа да мотор меццо-сопрано йӱкым пӧлеклен. Тудо кундемыштына марла академический мурымашым кӱшкӧ нӧлталын. Артистке ты шотышто марий калыкын чапшым кумда тӱняште волгалтарен: памаш вӱдла йыргыктыше йӱкшым Сибирьыште, Мӱндыр Эрвелыште, Украиныште, Белоруссийыште да моло вереат колыныт. Пӱрымаш Арбор мотор шуко пӧръеҥлан келшен. Илышыштыже пелашлан ойырымо еҥже-влак нергенат Светлана Сушкина шылтыде каласкалыш.

ТУКЫМ КЫЛ – МАРИЙ ФАМИЛИЙ ЭльтемЕровмыт – ЭльтемИровмыт – Олор ял тукым 💭 Шке тукымышт нерген Советский районысо Кыдал Кодам ял гыч вате-марий Ольга ден Альберт Эльтемеровмыт каласкалат: – Параньга район Олор ялыште кок сурт Эльтемеров фамилиян лийын, кызыт иктат уке. Шоҥгырак-влак ош тӱня дене чеверласеныт, ӱдыр-влак, марлан лектын, вес фамилийым нумалыт. Тиде кок суртышто Микытын Ямет ден Яндемыр эргыже-влак ешышт дене иленыт, нуно коктынат Кугу сарын тулыштыжо вуйым пыштеныт. Яндемырын ныл ӱдыржӧ лийын: Алина, Анна (Ална), Ямбика, Лиза. Яметын (южо документыште Демид) Волой (Володян) ден Зина йочаже-влак кушкыныт. Яндемырын еш гыч Эльтемеров фамилиян иктат кодын огыл. Волойын кум эргыжын ешыже да ик ӱдыржӧ Эльтемеров фамилийым нумалыт. Документым сайын ончалаш гын, ача-ава, 6 йоча тӱрлӧ фамилиян улыт: икте Эльтемеров, а весе – Эльтемиров. Тыште ялсовет пашаеҥ-влакын титакышт, шонем. Кузе Эльтемеров фамилий лектын? Олор ялыште пагалыме шоҥго Элтемыр кугыза илен, тудын тукымжо Эльтемеров фамилийым налын. Ты мотор фамилийым мемнан кок эрге-шешкым, кум уныкам, ик шӱжарна нумалыт. А Эльтемиров фамилийым Альберт пелашемын Толя шольыжын ешыже нумалеш: Валя пелашыже, эрге-шешкыже да кок уныкаже. Мо оҥайже, Олор ялыште ожно ик уремыште православный верам налше, а вес уремыште чимарий йӱлам кучышо-влак иленыт. Молан манаш гын шошым Марий Турек гыч тышке калыкым тынеш пурташ толыныт. Тыге ик уремысе калыкым тынеш пуртеныт, да нуно шукын руш фамилийым налыныт. А вес уремышке вӱдшорлан кӧра корем гоч вончен кертын огытыл. Сандене нуно чимарий веранак кодыныт, фамилийыштат марий лӱм дене кылдалтше лийын. Мыйын авамын Кугерге ачаже чимарий веран ыле. Йочаже-влакат марий лӱман лийыныт: Чинчывий, Настасий, Ямбатыр, Ямбика, Яндалчий.

Серызе Дbyf Рычкова дене вашлиймаш Шернур муниципальный округын Депутат-влак погынын председательжын мер приёмныйыштыжо «Единый Россий» партийын районысо пӧлкажын секретарьже Валентина Таникеева Россий писатель ушем член Дина Рычкова дене вашлийын. СВО-што геройла кредалше марий пӧрьеҥ-влак нерген Дина Рычкован патриотический сынан ойлымаш да почеламут сборникше-влак савыкталтыныт. 2025 ий мучаште «Волонтёры Победы» книгаже лектын. Тений «Герои Нашего Времени» сборникше лекшаш. 📷«Единая Россия» партийын районысо пӧлкажын ВК-се лаштыкше гыч налме.

✅Курыкмарий район администрацийым вуйлатыше Наталья Арганякова должностьшо гыч кая. Тидын нерген тудо ВК-се шке лаштыкыштыже возен. Наталья Николаевна ты пашам шым ий шуктен. – Курыкмарий районын историйыштыже икымше ӱдырамаш вуйлатыше лиям манын, ондак шоналтенат кертын омыл. Мый эрелан курыкмарий мландын да тудын калыкшын ужашыже семын кодам. Районна верч пырля тыршыше-влак эре шӱмыштем лийыт. Курыкмарий районлан ончыкыжымат вияҥаш тыланем. Тыгак увертарынем: мый вес вере илаш куснем да илышыштем у йыжыҥым тӱҥалам, тушкыжо оҥай паша ден пиалан еш илыш пурат, – возен тудо. 📷Н.Арганякован ВК-се лаштыкше гыч.

🤱🎁Марий Элысе Перинатальный рӱдерыште ава-влаклан уэмдыме пӧлек комплектым кучыктат Ӱмаште республикыште Перинатальный рӱдер деч пӧлекым налше ӱдырамаш-влак коклаште опросым эртареныт. Нуно наборысо предмет-влакым акленыт да тудым саемдыме шотышто тыланымашым ойленыт. Ынде уэмдыме комплектыш тыгай ӱзгар-влак пурат: йоча гигиене средства, капюшонан махровый солык, плед, пукшымо атылан нагреватель/стерилизатор, ниблер, поильник, пелёнка-шамыч, увертареныт Республикысе паша да социальный аралымаш министерствыште. 📈 2025 ийыште кундемыштына 1693 пӧлек наборым пуымо. 📸 Марий Элысе паша да социальный аралымаш министерствын фотожо.